МОЙЫНДАУ. . .
▪️
Алып ұшар қанатымның жоқтығын,
Аспан салды есіме.
Шындығы сол,
Шымшық құрлы жоқ құным,
Шіренемін несіне?
▪️
Жасын төгіп жылайтынын аспанның,
Жаңбыр салды есіме.
Тақтан бір күн құлайтынын патшаның
Тағдыр салды есіме.
▪️
Тағатымның,
Төзімімнің жоқтығын,
Таулар салды ойыма.
Таудай күнә арқалаған дерттімін,
Тараған у бойына.
▪️
Обал-сауап, сұрақ-жауап, ар сотын,
О, дүнием салды еске.
Таразылап ғұмырымның әр сәтін,
Тәңір-Ием салды еске.
▪️
Салмағымның,
Сабырымның жоқтығын,
Салды есіме Қара жер!
Түсіреді өмірімнің көп күнін,
Тәубесіне Қара жер!
▪️
Қара жердің болмайтынын түбі ырыс,
Қабір салды есіме.
Топыраққа айналарын бір уыс,
Тәнім салды есіме.
▪️
Теңіз-көлдің
Тереңдігін,
Тулаған
Толқын салды есіме.
Ал мен таяз ой-санамен бұлданам,
Айтыңдаршы, осы не?
▪️
Жабырқаулы
Жалғыз ару салды еске,
Махабаттың жоқтығын.
Махаббаты өлген оның сол кеште,
Мұңға беріп шаттығын.
▪️
Сырға берік шын достықтың жоқтығын,
Салды есіме сатқындық.
Болмаған соң сенім мықты, серт мығым,
Бәрі бекер, боқ тірлік!
▪️
Адамдарда ақиқаттың жоқтығын,
Айтты маған қар әппақ.
Өзегімді өртейді кеп от-мұңым,
Өмірімді парақтап...
▪️
Алып ұшар қанатымның жоқтығын,
Аспан салды есіме.
Шындығы сол,
Шымшық құрлы жоқ құным,
Шіренемін несіне?
▪️
#ҚалқаманСАРИН
#КалкаманСАРИН
#QalqamanSARIN
